ភ្នំពេញ៖ ក្នុងឱកាសដ៏សែនមហានក្ខត្តឫក្សវិសេសវិសាល នៃព្រះរាជពិធីយាងគ្រងព្រះបរមសិរីរាជសម្បត្តិខួបទី១៩ព្រះវស្សា របស់ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ឯកឧត្តមរដ្ឋមន្ត្រី ជា សុមេធី តាងនាមថ្នាក់ដឹកនាំ មន្ត្រីរាជការគ្រប់លំដាប់ថ្នាក់ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានសូមព្រះបរមរាជានុញ្ញាត អភិវន្ទលំអោនកាយវាចាចិត្ត ក្រាបបង្គំសម្តែងថ្វាយនូវព្រះសព្ទសាធុការពរជ័យ បវរសួស្តី សិរីវឌ្ឍនា វិបុលសុខ មហាប្រសើរ ថ្វាយចំពោះព្រះករុណាថ្លៃវិសេស ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ប្រកបដោយព្រះកាយពលមាំមួនខ្លាំងក្លា ព្រះបញ្ញាញាណភ្លឺថ្លាត្រចះត្រចង់ ព្រះរាជសុខភាពល្អបរិបូណ៌ ព្រះជន្មាយុយឺនយូរ ដើម្បីទ្រង់គង់ប្រថាប់ក្នុងព្រះបរមសិរី រាជសម្បត្តិ និងជាម្លប់ដ៏ត្រជាក់ដល់កូនចៅទូទាំងព្រះរាជាណាចក្រកម្ពុជា ជាយូរអង្វែងតរៀងទៅ។

ឆ្លៀតក្នុងឱកាសដ៏ប្រពៃថ្លៃថ្លានេះផងដែរ ឯកឧត្តមរដ្ឋមន្ត្រី ជា សុមេធី បានសូមព្រះបរមរាជានុញ្ញាតសម្ដែង ថ្វាយនូវកតញ្ញូកតវេទិតាធម៌យ៉ាងស្មោះស្ម័គ្របំផុត ថ្វាយចំពោះព្រះមហាករុណាទិគុណ និងព្រហ្មវិហារធម៌របស់ ព្រះករុណាថ្លៃវិសេស ដែលតែងតែយកព្រះរាជហឫទ័យទុកដាក់ពុំចេះនឿយណាយព្រះកាយពលចំពោះជាតិ មាតុភូមិ និងប្រជារាស្ត្រទូទាំងនគរ ប្រកបដោយព្រះរាជហឫទ័យសប្បុរធម៌ថ្លៃថ្លា សណ្ដោសប្រោសប្រណីដល់ ទូលព្រះបង្គំខ្ញុំម្ចាស់ ទាំងអស់គ្នាគ្រប់ពេលវេលា។

ឯកឧត្តមរដ្ឋមន្ត្រី ជា សុមេធី សូមលើកហត្ថប្រណម្យបួងសួងដល់ទេវតាថែរក្សាទឹកដីនៃព្រះរាជាណាចក្រកម្ពុជា គុណបុណ្យព្រះរតនត្រ័យកែវទាំងបី និងវត្ថុស័ក្ដិសិទ្ធិទាំងឡាយក្នុងលោកសូមព្រះអង្គ តាមជួយអភិបាលបីបាច់ថែរក្សា ប្រោះព្រំសព្ទសាធុការពរជ័យគ្រប់ប្រការថ្វាយចំពោះ ព្រះករុណាថ្លៃវិសេស និង សូមព្រះអង្គទ្រង់ប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ ជានិច្ចនិរន្តរ៍កុំបីឃ្លៀងឃ្លាតឡើយ៕